Dýralækningastofa Helgu Finnsdóttur

Margir gæludýraeigendur þurfa að flytja búferlum milli landa og í flestum tilfellum fer auðvitað öll fjölskyldan með, þ.e. bæði tví- og ferfættir. En hvernig er að taka hundinn eða köttinn með sér; eru reglurnar eins í öllum löndum og eitthvað hlýtur flutningurinn að kosta.

Flutningur gæludýra frá Íslandi til Evrópu er venjulegast bæði einfaldur og vandalaus, en Evrópusambandið hefur sett aðildarlöndum sínum sameiginlegar reglur um flutning gæludýra þangað, m.a. um bólusetningu gegn hundaæði (Rabies). Misjafnt er reyndar milli landanna hversu löngu eftir bólusetninguna dýrin mega koma, en eitt þeirra, Bretland,  hefur að auki sett fram sérkröfur um innflutning hunda og katta; kröfur sem geta verið bara anzi snúnar.

Hér segir af ferðalagi tíkarinnar Lukku sem fluttist af landi brott um áramótin síðustu til að gerast brezkur þegn og var það hvorki þrautalaust né ódýrt.

Undirbúningur ferðarinnar og ferðasaga Lukku

Lukka

“Þegar fjölskyldan ákvað að flytja til Bretlands með skömmum fyrirvara, segir Edda Holmberg, eigandi Lukku, fór ég strax að kanna hvernig við gætum flutt hundinn okkar, hana Lukku, með okkur út. Það fyrsta sem mér datt í hug var að hafa samband við breska sendiráðið á Íslandi og bentu þeir mér annars vegar á heimasíðu Landbúnaðarstofnunar þar sem finna má þær kröfur sem Bretar gera um innflutning gæludýra og hins vegar á vefsíðu breska ráðuneytisins um umhverfi, matvæli og byggðarmál “Department for Environment, Food and Rural Affairs (DEFRA)” en undir það ráðuneyti heyrir innflutningur gæludýra.”

“Í verklagsreglunum um innflutning gæludýra “Pet Travel Scheme/PETS” stendur nákvæmlega hvernig eigi að bera sig að því að fara með hund eða kött til Bretlands. Samkvæmt PETS getur maður flutt dýr til Bretlands og sloppið við 6 mánaða sóttkví (sem annars er krafist), uppfylli dýrið ákveðnar reglur um bólusetningu gegn hundaæði, mælingu gegn mótefnum þess í blóði, örmerkingu og lyfjagjöf gegn innvortis og útvortis sníkjudýrum og að lokum heilbrigðisskoðun nokkrum dögum fyrir brottför.

Auk alls þessa gera Bretar einnig þær kröfur, að komi dýr frá landi þar sem flutningsfyrirtæki (Approved transport company, t.d. Icelandair/IcelandExpress) hefur ekki gert samning við bresk yfirvöld, verður dýrið að fara í 2ja daga sóttkví í einangrunarstöð við komuna til Bretlands, á meðan farið er yfir innflutningspappírana!

Eins og er, er ekkert íslenskt flutningsfyrirtæki sem hefur þessa viðurkenningu, svo ekki varð hjá því komist að Lukka færi í einangrun í 2 daga. Þeir hjá DEFRA bentu mér á einangrunarstöð sem mér leist vel á og var rétt hjá Heathrow. Stöðin heitir “Airpets Oceanic“.

“En fyrst af öllu var það bólusetningin gegn hundaæði. Til að bólusetja gegn hundaæði á Íslandi þarf leyfi viðeigandi yfirvalda, þ.e. Landbúnaðarstofnunar, en um það sá Helga dýralæknir og gekk það bæði fljótt og vel.

Lukka var svo bólusett 24. apríl 2006 og frá þeim degi urðu að líða 30 dagar þar til mæla mátti hvort myndast hefðu nægileg mótefni. Það kostaði aðra heimsókn til Helgu sem tók blóð sem var sent á rannsóknarstofu (BioBest) í Bretlandi. Frá þeim degi sem jákvætt svar  rannsóknarstofunnar lá fyrir, þurftu svo að líða 180 dagar þangað til Lukka mætti fara af stað og var hún sett í fóstur heima í 6 mánuði, því við vorum flutt út.”

“Ég hafði samband við einangrunarstöðina sem sá um alla pappírsvinnuna sem virtist ekki vera neitt smáræði. Þar sem Bretar eru ofur-nákvæmir og skjala-óðir tók þetta nokkur e-mail og skjalasendingar fram og til baka, meðal annars frá dýralækninum á Íslandi um hvar og hvenær dýrið væri örmerkt, bólusett og fleira. En það hafðist allt saman á endanum, enda var ég með góðan fyrirvara (sem ég tek fram að er mjög mikilvægt) og góða hjálp frá Helgu dýralækni.”

“Bretar gera einnig þá kröfu að dýrið sé flutt í “löglegu” búri til landsins og fékk ég líka upplýsingar um það hjá DEFRA. Þar sem Lukka hafði aldrei verið í búri, þurfti að venja hana við það áður en hún færi út. Benda má á að t.d. Dýrabær selur svona búr.”

“Einum til tveimur dögum fyrir brottför þurfti Lukka svo að fara aftur til dýralæknisins til að fá heilbrigðisskoðun og lyf við sníkjudýrum, bæði innvortis og útvortis. Lukka fékk töflur gegn bandormum og lyfið ,,Advocate” (blettunarlausn) sem er sett á húð á herðakambi og er fyrir útvortis sníkjudýr. Þegar sá dýralæknir sem gefur vottorðið út er ekki opinber embættisdýralæknir, verður að fá stimpil opinbers dýralæknis. Til að fá hann urðum við að fara með pappírana hennar Lukku að Keldum við Vesturlandsveg, þar sem dýralæknir Landbúnaðarstofnunar sem og héraðsdýralæknirinn í Reykjavík hafa aðsetur, og gekk sú heimsókn fljótt fyrir sig.”

“Þegar þetta allt var allt yfirstaðið, hófst ferðalag Lukku sem gekk vonum framar og allt stóðst eins og stafur á bók. Fólkið í Cargódeildinni í Keflavík tók rosalega vel á móti henni, þannig að hún var ekkert mikið stressuð fyrir flugið.Síðan gekk allt mjög vel hjá Airpets og þeir hringdu strax í okkur þegar þeir höfðu náð í Lukku.

Dýralæknir einangrunarstöðvarinnar bólusetti Lukku strax og hún kom þangað gegn hundapest (Canine distemper) samkvæmt ráðleggingum Helgu, því sá sjúkdómur er ekki til á Íslandi.”

“Núna er Lukka komin með flott, breskt “hunda-vegabréf” sem heimilar henni að ferðast um alla Evrópu, svo kannski að Lukka gerist ferðalangur!”

Gæludýrapassi Lukku

Inni í passa Lukku

Kostnaðurinn við ferðalag Lukku

• Hundabúr kr. 37.000

• Futningur með Icelandair kr. 54.000

• Airpets einangrunarstöðin kr. 78.000 (allir pappírar meðtaldir.)

• Bólusetning og blóðsýnataka  kr. 15.000 ca.

• Dýralækniskostnaður fyrir brottför frá Íslandi kr. 8.000 (með lyfjum)

Samtals eru þetta 192.000 krónur sem er ekki gefið, en fyllilega þess virði þegar upp er staðið og dýrið er komið til manns.

Allavega erum við og Lukka alsæl að vera saman á ný.

Bestu kveðjur,
Edda Holmberg
4 Lynn Close
NR7 0WY Norwich
U.K.

Lukka úti í garði