Kostnaður við sæðingu með frystu sæði
Höfundur: Helga Finnsdóttir • 16. júní, 2008 • Flokkur: Almennt, HundarMikill ávinningur er fyrir hundarækt á Íslandi að geta bætt ræktun hundastofna hér á landi með sæði beztu undaneldishunda sem völ er á í heiminum. En margir velta efalaust líka fyrir sér hver kostnaðurinn er við sæðingu með frystu sæði sem og við innflutning þess.
Ekki er unnt að gefa upp ákveðið heildarverð á sæðingu, því kostnaðurinn fer t.d. að nokkru leyti eftir því hve oft þarf að taka blóðsýni og hvort sætt er einu sinni eða oftar, hvað sæðið sjálft kostar, hvaðan það kemur og þar með flutningskostnaðurinn, innflutningskostnaður og svo hve lengi það er geymt. Hér á eftir er kostnaðurinn varlega áætlaður, en tekið skal skýrt fram að önnur verð en verð samkvæmt gjaldská stofunnar, eru einungis leiðbeinandi og geta auðveldlega breytzt, t.d. við breytingar á gengi gjaldmiðla!
Móttaka og geymsla sæðis
Lágmarksgeymslukostnaður á frystu sæði hér á stofunni er 39.500 krónur, en innifalið í því verði er móttaka þess og geymsla í 6 mánuði.
Móttaka og geymsla í 6 mánuði: 39.500 krónur
Móttaka og geymsla í 12 mánuði: 52.500 krónur.
Blóðsýni
verður að taka til að ákvarða egglos og getur þurft að mæla prógesterónmagn í blóðinu nokkrum sinnum. Fyrsta blóðsýni kostar um 6.800 krónur, en eftirfylgjandi sýni eru nokkru ódýrari.
Sæðing
með frystu sæði kostar um 68.800 krónur, en þá er miðað við að sætt sé tvisvar sinnum.
Innifalið í verðinu er ein ómskoðun.
En margvíslegur annar kostnaður er samfara innflutningi frysts sæðis eins og t.d.:
1. Innflutningsleyfi
Sækja þarf um leyfi til innflutnings sæðis til Matvælastofnunar.
Innflutningsleyfi: 10.840 krónur.
2. Rannsóknir
Til að fá leyfi fyrir innflutningi sæðis, þarf hundurinn að vera bólusettur gegn hundæði, komi hann frá landi þar sem hundaæði finnst og aðrar bólusetningar þurfa einnig að vera í fullu gildi (margir sjúkdómar geta borizt með sæði, jafnvel frosnu.). Eftirfarandi verð miðast við rannsóknir á Norðurlöndum.
Bólusetningar og heilbrigðisskoðun: ca 12.000 krónur.
Bólusetning gegn smitandi fósturláti (Brucellosis): ca 9.000 krónur.
3. Flutningskostnaður
fer vitaskuld eftir því frá hvaða landi sæðið kemur og einnig þarf kaupandinn að leigja flutningstank.
Flugfrakt (miðað við Norðurlönd): 20.000 krónur
Leiga á kút: 15. - 20.000 krónur
4. Og svo er það sæðið sjálft!
Verð á hundasæði er auðvitað misjafnt frá landi til lands og fer auðvitað einnig eftir því hve verðmætur hundurinn er og svo er líka kostnaður við rannsóknir, heilbrigðisskoðun hundsins, töku sæðisins og frystinguna.
Helga Finnsdóttir , dýralæknir, lauk námi frá Konunglega dýralækna- og landbúnaðarháskólanum í Kaupmannahöfn 1979. Starfaði sem dýralæknir á göngudeild skólans (Ambulatorisk Klinik) til ársloka 1980. Var í sérnámi í sjúkdómum hunda og katta í Kaupmannahöfn 1993 - 1996 og hlaut að námi loknu viðurkenningu danska dýralæknafélagsins sem fagdýralæknir í sjúkdómum hunda og katta. Hefur sótt fjölmörg námskeið erlendis eftir að námi lauk í smádýralækningum sem og atferli hunda og katta.
Formaður vísindaráðs Hundaræktarfélags Íslands og einn af stofnendum hvolpaskóla HRFÍ (1986) og viðurkenndur leiðbeinandi á hvolpanámskeiðum skólans. Ritsjóri SÁMS, félagsblaðs HRFÍ 1987 - 1992 og hefur ritað fjölmargar greinar um sjúkdóma hunda og katta. Hefur verið skipuð í nokkrar nefndir um málefni gæludýra.
Skoða allar færslur sem Helga Finnsdóttir hefur skrifað
